Félagsbústaðir hf.
Skil á ársreikningum reikningsárin 2011 og 2012
Við eftirlit með ársreikningi félagsins Félagsbústaða hf. fyrir reikningsársins 2011 kom í ljós að ársreikningur félagsins var ekki gerður í samræmi við alþjóðlega reikningsskilastaðla (IFRS).
Ákvæði 90. gr. laga nr. 3/2006 um ársreikninga kveður á um að félög sem hafa verðbréf sín skráð á skipulegðum verðbréfamarkaði í ríki innan Evrópska efnahagssvæðisins skuli beita alþjóðlegum reikningsskilastöðlum við samningu samstæðureiknings síns og ef því er ekki skylt að semja samstæðureikning skulu félög beita stöðlunum við samningu ársreikninga sinna.
Í maí 2012 ákvarðaði ársreikningaskrá að Félagsbústöðum væri skylt að beita IFRS við gerð og samningu ársreikninga sinna. Ákvörðun ársreikningaskrár var svo staðfest af atvinnuvega- og nýsköpunarráðuneytinu í júlí 2013, en félagið hafði kært ákvörðun ársreikningaskrár til ráðuneytisins.
Félagsbústaðir hf. hafa gert samkomulag við ársreikningaskrá um að endurgera ársreikninga félagsins vegna reikningsáranna 2011 og 2012 í samræmi við IFRS og skal endurgerð og birtingu þeirra verða lokið ekki síðar en 31. janúar 2014. Fréttatilkynning frá Félagsbústöðum hefur verið send til Nasdaq OMX Iceland (Kauphöll Íslands).